NBA勇士後衞史堤芬居里（Stephen Curry）一傷再傷，真係令唔少球迷擔心，好彩經過一日休息後，佢克服小腿傷復出鬥黃蜂，輕鬆上陣31分鐘就拎到30分，加上大前鋒祖蒙特格連（Draymond Green）連續三場拎到大三元，喺勇士隊史第二人，主隊輕鬆以111:101勝出，戰績改寫至32勝兩負。
居里今時今日咁出名，大把人幫佢起底，美國網站bleacherreport就搵到佢幾歲大嗰陣，同當時效力黃蜂嘅老竇戴爾居里（Dell Curry）一齊拍漢堡包店廣告，講起對白嚟都有板有眼；而且佢當年仲好趣緻（小圖），唔做球星改行做童星都得啦。
