市場預期，美國今年失業率有機會跌至5%以下，對於最鍾意睇就業數據的美國聯儲局主席耶倫黎講，當然開心都嚟唔切啦﹗不過，美國勞工統計局最新調查發現，美國越來越多人話要退休，其中20至24歲的「退休」後生仔較十年前多一倍﹗不過就無講明，「退休」的定義是否包括唔打工做廢青的後生仔喇﹗
調查指，2014年美國有35%的人口並不計入勞動力之內，較2004年的31.3%上升3.7個百分點，當中無中學畢業的非勞動人口比擁有學位的多出三倍。另外，由於美國過去十年頻頻出兵，令25至54歲退休軍人傷殘數字亦由2003年的72.6萬人大增至2014年的120萬人，影響勞動市場。
聯儲局前副主席Alan Blinder就擔心，越來越多人唔想返工，好快有機會出現「有工無人返」的情況，長遠會令到工資上漲引發通脹。
美國聯儲局未來加唔加息，或多或少都要睇住個就業情況，但係廿幾歲仔就退休唔願做，睇黎耶倫都有排頭痕了！