【本報訊】市建局首個資助房屋煥然壹居昨起接受申請及開放示範單位，全日錄得1,560人次參觀，反應較以往資助房屋冷淡，《蘋果》聯同驗樓專家詹濟南實地睇樓，發現有開放式單位通風和採光不理想，面積細，建議欲購買的新婚人士「結咗婚就唔好生仔」，一房及兩房單位亦甩漏多多，露台、廚房和廁所各有瑕疵，但整體質素尚算合格。
記者：鍾雅宜
煥然壹居昨共開32個不同款式及面積的單位供申請者參觀，但早上未見有人排隊睇樓，另外，大角嘴銷售處則有261人到場，反觀2012年房協推出資助房屋綠悠雅苑及2014年房委會推出新居屋時，示範單位首日開放分別有3,000及5,400人到場，今次計劃明顯反應較遜色。
露台崩磚手工粗糙
《蘋果》昨與驗樓專家詹濟南到場視察，檢驗開放式、一房單位和兩房單位。他認為3款單位合格，附送的廚櫃和雪櫃等家具屬中價貨，但低座通風和採光不理想，其中二樓D室的開放式單位，由於面向內街及對面的高座，通風不理想，日光亦被對面大廈阻擋，相信日間亦難採用天然光線照明，且面積太細，「一間房都間唔到，結咗婚就唔好生仔喇」。
另一個同樣位於低座二樓的H室一房單位，面向日後落成的居屋地盤，詹認為方向和採光較好，睡房亦可多間一間房，「結咗婚都生到一個嘅，放到BB床」，但裝修有不少瑕疵，如露台有崩磚，浴室企缸手工粗糙，連熱水掣都「鬆鬆哋」，客廳窗戶面對牆外渠位和隔鄰窗口位，鄰居「食咩飯都睇到。」
高座8樓A室兩房單位面向日後的啟德鐵路站，景觀較開揚，客廳足夠放置梳化和電視櫃，主人房可放6呎半乘4呎床，詹稱：「唔可以畀姚明瞓，劉翔仲可以」，但放置衣櫃後活動空間有限，主人房其中一邊天花板亦有一道「假陣」，「頂住晒唔係咁好」，至於另一睡房亦可容納4呎乘6呎床，但僅能放個小櫃，而從客廳露台向外望則是正施工的地盤，景觀較差。
詹指該單位廚房「切菜位」位於轉角位有點奇怪，不便下廚，雪櫃門「頂住」廚房門，門太重難開關，飯廳插蘇位置不足。整體來說，他認為一房單位質素較好，其次為兩房，最差為開放式單位，但一般示範單位都「執得靚」，不能完全作準。
睇樓人士心聲
曾先生
「以現時樓市，500幾萬元都算合理，但估計未來景觀會俾隔籬樓盤擋住。」
陶先生
「打算幫子女睇樓，會幫佢哋畀首期，400幾呎單位，賣5、600萬都值嘅。」
