最近游學修於電視節目的「揀男神」環節，不幸被華人置業主席劉鳴煒K.O.。一眾港女明明未見樣前，讚游學修說話夠「幽默」、「價值觀」啱聽、仲憧憬其「腹肌」；豈料一知二人真身立即轉軚，話劉鳴煒整個「Package」好啲。所謂Package，說白了還是劉鳴煒的背景吧。港女揀男神，其實結果並不意外，令我想起的，卻是比利時前鋒盧卡古(圖)。
數年前的盧卡古，可比喻為「游學修」：年輕力壯有潛力。但當時其東家車路士只將他當後備，或不斷外借；到2014年，車仔需要一位新的當家前鋒，左思右想，最後還是選擇不再給機會予盧卡古，將他賣往愛華頓，再高價從馬體會購入球星迪亞高哥斯達（DC）。可能車仔都係覺得DC個Package好啲：馬體會冠軍功臣、國際球星、波衫都賣多幾件……所謂Package，說白了還是DC的名氣吧。
上季聯賽DC確入了20球；但今季與摩佬鬧翻、場上行為遭人詬病、本季聯賽暫只入得六球。我不敢說盧卡古肯定比DC好，但事實證明他可以茁壯成長。大球會揀球員，重名氣，求即食，不願給年輕球員成長機會，與「港女揀男神」是否有幾分相似？但別以為「被放棄」的盧卡古是輸家；現效力球會或非「貌若天仙」，但懂得「欣賞」自己，且肯定是其心中正選。人揀你你揀人，我係盧卡古，都肯定會揀做愛華頓的正選，而非「港女」車仔的後備。
方栢翹
now足球評述員