「2016，奧運年，feeling excited！」終於踏入2016奧運年，連香港「女車神」李慧詩（Sarah）都忍唔住喺fb寫番句「好刺激呀」，更刺激係下星期五（15日）起一連三日，佢會第一次喺香港單車館出戰世界盃場地單車賽；美中不足係部份勁敵，包括澳洲美雅絲同德國「女警」禾高都冇報名，反而上月喺新西蘭站凱林賽決賽撞跌Sarah嘅南韓車手李慧貞同中國勁敵郭爽就榜上有名，車迷記得入場撐Sarah！
香港站係15/16年度世界盃嘅第三站，亦係壓軸一站。喺今季頭兩站，Sarah只得舊年11月喺哥倫比亞首站贏得一面爭先賽銅牌，原本上月喺新西蘭站凱林賽殺入六人決賽有機會攞牌，點知臨尾150米俾南韓李慧貞撞跌，最後只得第五。
香港站世界盃係里約奧運倒數第三個搶分賽，禾高目前喺爭先賽分數暫列第二，佢同凱林賽排第二嘅美雅絲夠晒分去里奧，所以玩少一站都無傷大雅，至於凱林賽暫列第四、爭先賽第六嘅李慧詩，香港站最大勁敵估計係郭爽同林俊紅兩位中國車手。
卡雲迪殊落實來港戰全能賽
今次總開支約1,000萬港元嘅世界盃，亦吸引到38隊國家隊同七支職業車隊、近300名選手訪港，包括英國環法名將卡雲迪殊（Mark Cavendish）都會參加男子全能賽，以及倫奧女子團體追逐賽同全能賽雙金得主卓爾（Laura Trott）。比賽最後兩日（16至17日）票價120至300港元，現正於快達票有售。