房屋署位於何文田嘅總部外面，一直有個巨型嘅紅色標記，唔少團體次次去房署請願、甚至電視台嘅記者要「做扒（Standupper）」，都會揀個地標做背景，等大家一睇就知佢哋喺邊！
但係八方噚日朝早去到何文田房署總部、準備聽吓佢哋一年一度嘅財政預算案時，發現呢個紅色巨型標記，竟然被棚架同帆布圍封。有行家仲呻，今日無得喺地標前做扒咯！
八方靜雞雞揭開帆布偷睇過，發現標記嘅紅色冇咗，變咗白色。到底係乜原因要令標記不再紅？定只係暫時失色以便重新上色？好彩房屋署發言人回覆八方，話係為標誌定期重髹紅漆，由於近日天雨同濕度較高，預計尚需兩周先完成。