啱啱2016年過咗幾日之嘛，已經有啲駭人聽聞嘅事發生咗，有人可以無啦啦喺香港消失喎，點知下個係咪輪到自己？
曾經係失蹤過來貓嘅尖東忌廉哥，都喺facebook撐銅鑼灣書店東主李波，話如果當年唔係獲大家幫忙搜索，未必可以平安回家，忌廉哥仲貼咗張忌廉嫂錫佢嘅相，似乎祝福李波都同妻子大團圓！
「大家緊張貓多過人」
忌廉哥喺香港爆紅，源於2012年7月失蹤過。「鎮守」尖東南洋中心地下報檔嘅忌廉哥突然失蹤，主人懷疑偷貓賊所為，街坊同網民自發喺附近貼尋貓啟事，結果大半個月後，主人喺市民報料幫助下，喺尖東一個停車場搵番忌廉哥，「人貓大團圓」 ，忌廉哥更搖身一變成為尖東吉祥物。
眼見今次有人失蹤，忌廉哥都好感觸，fb管理員代佢「感懷身世」，話踏入2016年，「世界很多事在測試我們是否已經變得麻木，錯誤犯一百遍不會等同正確，荒謬的事、戰爭殺戮每天發生不等於就要合理地承受，只求有錢有樓的價值觀，也不等於要放棄自己盲目追求。」
雖然忌廉哥冇點名撐李波，但佢重提當年失蹤時，若非得到大家關心，「大家為我呢隻貓失蹤緊張過一個人失蹤，我都未必可以平安返家」，𠵱家唔會得閒就被老婆仔親親咁「爽皮」，然後好感性咁話：「但願我們不會將身邊所有已扭曲的習以為常，變成木木獨獨一碌木。」唔知呢篇「忌廉．波」留言，會唔會打動到香港人？
李八方
mailto:[email protected]