新年伊始，祝大家股運亨通，想點就點！去年被譽為「最難賺錢的一年」，全球股市在今年開首已經嚇到大家心慌慌，不過，在波濤洶湧的股海中，建議大家首先穩陣下錨，就可以放心游走！
講緊大家應該找返隻收息股，放入你的投資組合，無論A股再熔斷多少次，至少都可以安坐收息！內銀股近年增長確實麻麻，不少人已經將內銀股當成一隻收息股，因為隨便揀一隻，股息率都超過6厘！相較息率得3厘、貶值到冇眼睇的人民幣資產，內銀股相對更為穩定。
當中，建行（939）的股東回報率（ROE）達18.4%，為多間內銀中之冠，即是建行相較同業，賺錢回來供養你的能力最高，作為股東當然更加放心。同時，建行的股息率非常可觀，超過7厘，加上該行管理層已承諾會維持派息比率33%，毋庸置疑是收息的首選。
內銀股面對內地減息、不良貸款等等風險，但德銀話銀行資產質素壓力已反映在股價中，惟淨息差有機會進一步收窄，加上經濟放緩影響，令今年盈利增長受壓。不過，細心睇睇，建行仍然賺千億元，作為收息股綽綽有餘，股價於5元附近有支持，加上AH股價有30%溢價，可考慮下錨！
Melody
本欄逢周三刊出