82歲黑石副主席韋恩（Byron Wien）年年都推出「十大驚奇」預測，今年亦唔例外。韋恩按慣例列出十樣有一半機會發生嘅大事。當中最「驚奇」就係睇死美國聯儲局只加息一次，同埋今年日圓貶值到130水平，每百日圓兌港紙咪跌穿「六算」見5.8算囉。
韋恩喺今年十大驚奇都有提到中國，估中國經濟增長僅5%。佢又估人民幣今年繼續貶值，同其他大行一樣估人民幣兌美元跌至7算。韋恩今年都唔睇好美國經濟，估美股會大跌，又話紐約同倫敦嘅豪宅冇運行，因為少咗中國同俄羅斯嘅大戶入市。
雖然韋恩嘅「十大驚奇」寫咗31年，但命中率相當低，約三成左右。韋恩舊年就估錯6項。佢估儲局上年中加息，實情儲局等到12月先加息；佢睇好標普500指數回報率15%，點知標指表現甩轆，全年回報負0.75%，仲係金融海嘯後最差。