李波疑被公安擄走事件引伸到娛樂圈，陶傑前晚喺facebook透露佳藝電視喺70年代拍嘅《神鵰俠侶》，入面位第一代小龍女李通明，原來就係「用自己方法返大陸」嘅李波嘅胞妹，只可以慨嘆一句世界真細小。
楊過羅樂林：冇聯絡
講起呢位小龍女李通明，當年佢憑一對大眼都真係迷到唔少後生仔。呢位大眼妹當年除咗成名作《神鵰》之外，都參與唔少電視劇集演出，好似《武則天》、《雪山飛狐》等等。李通明計落都已經58歲，不過自從82年佢結婚息影之後，都已經冇同圈中人有聯絡。就算當年同李通明係佳視訓練班同學、仲係結婚姊妹團成員嘅魏秋樺噚日接受電話訪問時都話好耐冇聯絡：「唔知李通明有個哥哥叫李波，冇聽過，同李通明好多年冇聯絡，都冇聯絡電話。」而喺《神鵰》入面演楊過嘅羅樂林，佢噚日都話：「李通明冇同圈中人聯絡。」
何韻詩喺facebook都講到李波事件，佢反問：「好，就當我哋全部人都係低B冇腦的，接受李波『被平安』嘅說法。咁，另外四個人呢？另外四個人呢？？另外四個人呢？」對於議員吳亮星話被失蹤嗰「5條書局友」，是因為「叫雞被公安拉」，黃秋生怒轟：「阿星，人哋叫雞你都知？唔係咁啱你又叫緊呀？」
撰文：馮仁昭
