繼俞琤宣佈離任商台董事及副主席之職後，新城電台及港台分別都傳「地震」，新城知訊台更是重災區，本報早前亦報道過音樂、娛樂及製作總經理、新城知訊台台長朱明銳被退休，據悉知訊台約有十人被裁，包括當日由朱明銳邀請來主持節目的陳少寶，而陳的《少寶與文狄》主持拍檔杜文狄亦都冇得留低。
陳少寶昨日接受《蘋果》電話訪問，他承認已經接到通知，他表示：「我覺得你新城瘦身也好，因權力鬥爭都好，但一個電台係咪應該以聽眾嘅福祉為依歸，點可以冇交代就將一個受歡迎節目殺咗？呢個瘦身行動，清除異己好嚴重！」
他又透露，上周四除夕當日與霍建寧表弟、新城高層宋文禧見面後就收到通知，沒有轉圜餘地，他說：「佢話嚟緊節目有新方向，我哋主持個節目會結束，我諗住可以喺最後一集同聽眾講拜拜，點知當日人事部就通知唔使再做，連講拜拜都唔畀，我真係好嬲，電台完全唔理聽眾感受，我諗住半退休心態玩吓，但佢哋冇問我可唔可以收平啲，叫我走就走。」
網民fb求解釋
陳少寶又批評新城沒有公眾責任，亦在facebook向因未能在節目親口向聽眾道別說抱歉，不少網民留言力撐他，狂轟新城處理得差，有支持者更到電台fb專頁瘋狂留言要求新城解釋。
至於《新香蕉俱樂部》主持杜浚斌（Ben）傳聞在裁員名單內，昨日他在電話說：「唔好嚇我啦，好坦白未收到消息，但自己都想轉換環境，唔關地震事。名單有我幾出奇？唔敢講係咪分派系事，可能我喺公司比較抽離，自己未收到有冇事，只知少寶哥離咗職。」本報向新城電台查詢裁員傳聞，其公關部表示：「我們不會評論巿場傳言。」
港台二台節目總監何重恩則表示，港台沒有炒人之餘還會請人，並透露本月10日鄧健泓會加入港台主持節目《有冇搞錯》。而何嘉麗離職與裁員無關，純粹是個人決定。
採訪：鍾國仁、皓騫、魯吉