曾幾何時，小米手機係唔少香港人好恨搶到嘅一部手機，搞到小米董事長雷軍都好睇重香港，舊年仲喺旺角開咗間「小米之家」，噚日小米市場部同香港傳媒聚餐，佢哋小米香港負責人羅燕話，「小米之家」每日人流量已超過1,000人，今年決定乘勝追擊，喺沙田開間維修中心，方便用家拎部機去維修。話時話，市場傳聞Apple Store遲吓打算進軍沙田，到時一眾新界「毒男」唔使次次出獅子山隧道。
噚日難得見到高級市場總監劉偉，華華點都要問吓小米舊年嘅銷量能否達到8,000萬部嘅下限，點知劉偉就話：「小米是一家沒有KPI（關鍵績效指標）的公司，每年都沒有目標。」嘩！小米嘅銷售目標突然「被消失」，不過佢後來補充話，銷量喺預期之內，對比中國智能手機銷量增長放緩，小米已跑贏大市，咁其實係有目標？定冇目標先？