當今世上騎功更勝雷神莫雷拉嘅騎師，可能只得天下第一高手莫雅一個。上個月佢喺國際賽日，先憑「高地之舞」奪得香港瓶，繼而夥拍「滿樂時」擒下港隊「大印銀紙」攻陷香港一哩錦標，佢跑大賽嘅功力，可以話令馬迷嘆為觀止。
嚟緊本月17號賽事起，莫雅將喺香港客串12個賽日，隨時喺連場大賽制衡雷神。而一眾練馬師當然識貨，莫雅未到，就已經卜定佢跑大賽。
好似蔡約翰馬房，就搵咗莫雅騎綽號太陽神嘅全港最高分四歲馬「首飾太陽」，角逐本月24日經典一哩賽。現評110分嘅「首飾太陽」，在港五戰四冠一亞，上仗輕取「萬事勇」，後駒再出砌低「包裝奔馳」勇奪華商會盃，以「首飾太陽」嘅戰績加埋莫雅嘅硬功，毫無疑問將係爭霸主角。而雷神就會喺經典一哩賽，騎蔡廐另一匹明星馬「澳斯卡」。屆時呢場大戰肯定矚目成為話題。
除咗「首飾太陽」外，苗禮德亦卜定莫雅，喺本月31日1200米一級賽百週年紀念短途盃，夥拍「龍城勇將」上陣。