今個禮拜三(6日)是2016年首次快活谷賽事，用A跑道作賽，睇番去年首次谷戰亦係用A欄，當晚除了「銀飛龍」後上贏馬之外，其餘頭馬全部於入直路初，已守於前四名位置，其中「勝任如意」、「天長地久」及「帝聖神駒」更加一放到底勝出，可見前置馬優勢非常大，想在新一年谷戰攞頭綵，宜秤先具前速之馬匹。今戰列陣馬中，第五場「開心駿馬」上仗正是於谷草A欄賽事一放到底贏馬開齋，勝後等番同一移欄再跑，睇部署有心求添食。此外，第七場「喜多盈」六次跑谷草A欄全勝未逢敵手，今次重返強項上陣，有力蟬聯一月盃。