美聯（1200）噚晚喺灣仔會展舉行一年一度周年晚會，同舊年一樣筵開200席，例牌請來各大發展商代表。撞正近月樓市氣氛相當麻麻，難得有咁多地產商高層現身，大家當然捉住佢哋問樓市前景喇（佢哋賣樓，當然唔會講得太淡）。
新地（016）副董事總經理雷霆拋出數據，指舊年一手成交量有1.6萬宗，反映剛性需求依然存在，預計今年樓市會平穩發展。佢講完冇耐，另一大發展商長實地產（1113）執行董事趙國雄就到，兩大「樓神」相會，喺一眾鎂光燈前，又握手又密斟，傾足成分鐘。
趙國雄之後接力評論樓市，預料「本港經濟平穩，而且有人工加，資金充裕，冇加息壓力，樓市即使有調整，都只係一成之內」。唔通佢哋頭先密斟，就係夾番個樓市平穩論？
身為主人家嘅美聯太子女黃靜怡呢晚悉心打扮，佢件晚裝疑似係大肚裙，唔通有喜？佢就否認，指條裙純粹係設計，仲話條裙出自本地設計師手筆，撐本土咁話。太子女結婚近兩年，佢話唔心急生仔，一切隨緣，而且今年工作仲好忙喎。