油尖旺區議會噚日首次召開會議，選出主席同副主席，本身大局已定，因為泛民只有3個人，連提名都唔夠人（起碼要有4人）。不過會議完咗之後影張大合照，年僅24歲嘅公民黨、油尖旺區「票王」余德寶，竟然要資深議員仇振輝幫佢打呔。
話說余德寶獲贈一條區議會領呔，佢匿埋一邊不斷打，打咗3次都搞唔掂，但其他議員已準備就緒，人人都問佢搞掂未？顯然有啲唔耐煩。就喺呢個時候，人稱仇sir嘅仇振輝一個箭步飛撲埋去余德寶面前，幫呢位「小鮮肉」打呔（圖），似足阿爺幫阿孫咁，全場即時爆笑。有人笑住話仇sir係咪爭出鏡？又有人話兩人喺度hehe喎。余德寶堅稱自己識打呔，但係無鏡先搞唔掂，總之多謝仇sir解困。