屋邨妹蘇麗珊唔buy華置CEO，唔怕捱窮，最怕技窮，所以男友游學修絕對係女神嘅Best Buy。蘇麗珊眼中的男友才高八斗，佢都不甘後人，去年接拍電影《哪一天我們會飛》後，決定到美國嘅紐約電影學院修讀為期2個月嘅短期課程「Acting for films」。
搭錯車等打救
日前蘇麗珊接受本報訪問時話：「舊年3月去，當時都幾驚，未試過自己一個人去到咁遠，又人生路不熟，自己係好驚冇人陪，係好需要人陪我嘅人。」出外靠朋友，蘇麗珊好彩有室友相助：「最好笑係我第一次就搭錯車，去咗一個唔知乜嘅地方，咁我即刻好驚，嗰時又夜晚11、12點，我就打畀我個roommate求救，好彩佢啱啱放工，教我去地鐵站接我走。」回憶留美好時光，佢學到唔少戲劇知識：「教一啲形態，點樣發聲，學咗好多好好基本嘅嘢，好似史提夫斯基係邊個，終於都知道。好多老師喺荷李活都有做演員，佢哋教書都只係part-time，其實佢哋都係演員，知荷李活點樣教演員，同埋𠵱家係用乜方法嚟演戲，知多咗好多嗰邊嘅嘢囉！」
撰文：馮仁昭
