民主黨主席劉慧卿元旦日宣佈今屆立法會任期後，唔會再爭連任，意味會為1991年起嘅議會生涯畫上句號。
可能因為入過中聯辦、又向建制派支持者揮過手，卿姐嘅一舉一動，似乎特別惹人遐想，皆因佢一話唔再選，就有消息傳佢為「轉軚」鋪路。轉乜軚？咪傳佢由泛民主派轉去親中陣營囉，仲話想打造佢係女版劉江華咁款。
「係就一早學劉江華」
點解又關已經升咗呢做民政事務局局長嘅劉江華事？皆因劉江華以前係港同盟成員、其後轉投民建聯懷抱，之後政途扶搖直上。查實卿姐對呢啲傳言都「冇佢咁好氣」咁款，道不同不相為謀嘛！
佢噚日喺電台話呀：「如果要轉軚，點解唔係好似劉江華咁，1994、1995年就轉（諷刺劉華退出港同盟，轉投建制，仲同民主派對撼），要等到2015年，轉軚都係想富貴榮華，點會到就嚟收工先轉？」
俾狄志遠話似鐵娘子
卿姐拒絕轉軚跳入劉江華嘅親中陣營，唔等於就此退隱講bye bye。佢強調，退下立法會火線之後，仲會繼續服務香港同埋國家，佢樂意做一位「小人物」，繼續同各界溝通，但佢就無意擔任任何官職喎。
至於前黨友狄志遠聲稱，有民主黨成員形容卿姐好似當年戴卓爾夫人被年輕黨員拉落台一樣咁喎，卿姐就話呀，黨內對佢離任有唔同嘅意見，有人覺得太遲、亦都有人覺得早，有黨友為佢大哭一場，自己則覺得係時候嘞，諷刺狄志遠退咗黨，知啲乜吖？
李八方
mailto:[email protected]