周日西甲華倫西亞主場對皇家馬德里，由兩位新舊華倫教練交鋒，幫華倫贏過西甲同歐霸盃嘅賓尼迪斯，𠵱家就係皇馬教練身份，不過再訪馬斯泰拿球場都獲得唔少球迷支持；相反，加利尼維利接手華倫後，聯賽都仲未開齋，就算打多皇馬一個，最終都係逼和對手2:2。
打多個僅逼和皇馬2:2
賓尼迪斯喺2004年幫華倫贏完西甲冠軍後就跳槽去利物浦，事隔11年幾再以教練身份到訪馬斯泰拿，就算係帶敵對球隊，「蝙蝠兵團」球迷都好念舊，掛出「賓尼迪斯，多謝你，你給予我們最好的時光」大橫額。肥賓麾下「BBC」組合就以一個組織相當美妙嘅入球報答球迷；16分鐘加里夫巴利先用後腳交畀基斯坦奴朗拿度（C朗），C朗就再用「no look pass」交畀賓施馬，後者喺禁區頂射入，皇馬先開紀錄。
華倫球迷覺得新不如舊又好難怪，事關加利佬上年12月接手球隊後，仲未喺聯賽贏波（見附表），只係喺西班牙盃贏過一場咁大把，好彩今場都唔使輸；45分鐘皇馬有比比輸12碼，柏利祖幫華倫追平。換邊後，皇馬有高華錫領紅牌被逐，不過少踢一人嘅客軍，82分鐘再由巴利頭槌再度領先，但開心唔夠一分鐘，華倫前鋒柏高艾卡沙再追平，踢成2:2。
肥賓同皇馬球員疏離
領軍四場聯賽不勝，華倫排名跌至第10位，加利佬賽後都講：「其實今仗係球隊今季最好表現，但仍然不足以獲勝，我希望球隊繼續努力，下場西班牙盃一定要贏。」不過加利佬同華倫合約只係到今季尾，佢都話要博到一張長約，就要改善表現。其實華倫球迷咁鍾意肥賓，不如就請佢返去教啦，事關肥賓個帥位都係不穩，皇馬未能乘巴塞上周六失分而拉近差距，𠵱家只得37分排第三，落後巴塞兩分之餘，更落後榜首馬德里體育會達四分。《阿斯報》仲火上加油，剪輯皇馬攻入第二球嗰陣嘅慶祝片段，見到一大班球員開心慶祝，但冇人理會肥賓，同球員關係咁疏離，睇怕佢都做唔長。《馬卡報》仲爆料話，皇馬噚日晏晝開高層會議，傾吓肥賓嘅前途。另外，C朗日前接受訪問嗰陣就講到退休後生活，話自己唔會向教練或領隊界發展，而係專注自己嘅品牌，希望建立商業王國咁話。