美國已經40年冇出口石油，但選擇喺2015年末解除石油禁令。油價140美元時唔出口，油價跌穿40美元先嚟出口，如果唔係有意將油價造落去，無法解釋呢種40年之珍視緣何轉變。美元萬劍歸宗第三步，就係要將行咗40年嘅美元迴路反轉嚟行。要明白美元點樣調轉嚟行，就要先明白美元同石油關係。
近40年美國都玩緊一套高級財技，中東產油國賣油只收美元，各國要買油拚命賺美元，中東產油國賺美元後有錢冇碇使走去買資產，美國繼續發債印銀紙。
乍聽之下美元似乎玩晒，但美國建立呢套高級財技前，其實正面對一次最嚴重嘅美元危機，個個爭住沽美元。
就喺呢個時候有個猶太人醒條橋畀當時的尼克遜總統，不單力挽狂瀾，更將美元扭轉乾坤變成全球貨幣體系的定海神針，呢個人叫亨利．阿爾弗雷德．基辛格。
銀紙要值錢過廁紙，係需要政府保證銀紙的兌換價值。然而歷史已證明政府係信唔過，貨幣系統發展到近代，背後需要硬通貨支持。1973年美國因赤字越來越嚴重，破棄原本保證35美元可兌一盎司黃金嘅承諾，觸發美元危機。中東國家早已不滿美國支持以色列，決定趁此時向以色列開戰，第四次中東戰爭爆發，同時對歐美實施石油禁運，製造石油危機。
世紀大deal影響金融體系
中東國家嘅如意算盤係，美國正為美元危機自顧不暇；再實施石油禁運歐美就唔敢支援以色列；同時揀以色列最鬆懈的贖罪日開戰，諗住實食冇黐牙。點知美國決定支援以色列，敍利亞、埃及、伊拉克、約旦4國再加背後12個軍事物資支援國都無法打贏以色列。
局勢僵持不下，各國都搵緊收手又不失體面的機會，於是基辛格開始實行佢嘅世紀大deal，或許佢亦估唔到當日的世紀大deal，會影響往後全球金融體系40年。
基辛格當時諗，銀紙衰過廁紙因為大眾對政府失去信心，要將冇人要嘅嘢變成人人爭住要，惟有將銀紙再次同有價值嘅嘢結合。
首先佢睇準各國想罷兵去斡旋講和，再利用沙地同中東國家矛盾，以美國提供軍火為條件要求沙地1974年開始賣油只收美元。沙地剛親眼見識過美國軍事實力，就應承咗佢。1975年推動OPEC賣油都以美元計價，打乜仗，不如有錢齊齊搵。所以1973年前美元背後係黃金，1974年後美元背後係石油。
現時全球主權財富基金持有7.1萬億美元資產，當中60%係靠賣石油起家。石油美元以正迴路運行時，全球資產都被貨幣追逐；一旦石油美元以逆回路運行，代表美國開始出口石油收回海外石油美元，同時產油國因油價低企收支不平衡，要賣資產填數。喺咁樣嘅情況下，美元將再次成為搶手貨。
Mr. Tregunter
本欄逢周二刊出