體壇拾趣：
「球星」基藍馬有柏圖做隊友

中國一聲令下話大搞足運，唔單止中超，就連中甲球會都大把水；好似擁有一對新舊港腳基藍馬同吳偉超嘅天津權健，新一季矢志衝上中超，季前竟然有錢到拉大隊去巴西聖保羅集訓，當中基藍馬仲俾當地傳媒追訪，成個球星咁款。

權健出476萬月薪挖角

權健現任教練係前巴西國家隊教練盧森保高，佢之前已經簽入前國腳射手路爾斯法比安奴同埋哥連泰斯嘅中場謝臣。巴西傳媒仲爆料，話盧森保高去到聖保羅，就會再同哥連泰斯傾吓柏圖加盟嘅事宜，據報權健仲肯為柏圖開出嘅400萬人仔月薪（約476萬港元）㖭。柏圖雖然傷患較多，但過去踢AC米蘭都有唔錯表現，佢上季以外借身份為聖保羅喺巴甲上陣33場，射入10球同交出五次助攻，仲幫球隊以第四名過終點；加上柏圖𠵱家只得26歲，如果順利加盟天津權健，肯定成為中甲頭號巨星。

至於新加盟天津權健嘅港將基藍馬，都喺社交網站爆響口，話柏圖最快今個星期搞掂。日前佢着咗件桃紅色外套到巴黎會合隊友，再轉機去聖保羅；噚日一到埗，就已經喺機場俾大批記者包圍，好似成個球星咁！天津權健都喺微博講笑話，如果基藍馬冇換衫，可能仲多人圍喎！