旅遊業最近六國大封相，有業界玩嘢退出登記店舖，據知同旅議會剛改選有關！
八方睇過一個發畀旅遊業界嘅WhatsApp留言，係老行尊葉慶寧（圖）早前選旅議會主席時，向專門接待內地客嘅業界承諾，指若然當選，兩個月後會推倒旅議會登記店舖計劃、限制旅行社只准帶團去登記店舖，規管強迫購物、賣假貨等。葉雖然輸咗，竟然仲履行參選承諾？業界估計佢想選下屆立法會旅遊界，而呢啲旅行社就係選民。葉慶寧係旅行社東主協會會長，今次牽頭玩嘢嘅林少麟「咁啱」係協會主席。林生據講喺九龍某大廈做包租公，出租單位畀幾十間旅行社，一手都係票，但據知啲地址幾乎一樣。葉慶寧截稿前未覆八方。