喺個個港腳都北上搵食嘅時候，2014年幫中甲球隊石家莊永昌升上中超嘅中場白鶴，反而喺新一年回流港超聯，加盟東方。噚日東方喺京士柏操練，就見到佢同港隊兼球會隊友徐德帥、鞠盈智傾得鬼咁開心，睇嚟初來埗到都好融洽喎！32歲嘅白鶴自己就話，本來都想喺中國踢多幾年：「開頭真喺冇諗過返香港，前後都有三間中甲球會搵過我；本身都決定去梅州五華，但喺簽約前一刻東方搵我傾，對方好有誠意，我就應承咗返嚟。」
白鶴仲話香港生活質素好，又多朋友會開心啲，香港隊練波都方便啲咁話，未來都唔會再考慮返內地踢波喎。東方嚟緊星期日就會同南華踢聯賽前列大戰，到時倒戈嘅白鶴就會首度着上東方波衫落場。