雷神停賽天下大亂？本周三(6日)夜賽冇咗雷神呢支扶手棍，馬迷點算好？騎師王應該捧邊個？
以座騎數量而言，今期只有兩人騎足8場，就是郭能及史卓豐，其中計座騎實力，郭能似乎略高一線，除了「萬馬奔騰」之外，其餘七駒季內都曾勝出或上名，「火乘風」、「千真萬確」、「電子群英」更係上仗非冠即位嘅馬，全部都有攞分本錢。而「醒目名駒」前仗喺沙田二班賽負133磅彈甩對手贏馬，上仗越級挑戰香港一哩錦標，面對「滿樂時」、「步步友」呢啲一級馬，亦只係輸四馬位左右，今次回師本身贏過嘅谷草，對手弱得多，當然郭能頭馬希望之一。
至於「電子群英」，上仗後上凌厲入Ｑ，今次原本雷神騎，但雷神停賽換郭能，今朝(4日)郭能過檔親自操練一課，呢次只係替工性質，未來雷神隨時攞番來騎，所以郭能一定唔會保留，砌盡隻馬就算。
仲有「火乘風」，上仗郭能初騎即入Ｑ僅敗，人馬合拍，今次仲要抽到3檔靚位，睇嚟騎師王捧郭能，隨時會有驚喜。