效力咗湖人20季嘅拜恩（Kobe Bryant）自上年11月宣佈打埋今季退役後，有唔少球迷都想知「紫金軍團」會將8號定24號波衫掛上史達普斯中心球場。湖人總經理古卓克（Mitch Kupchak）禮拜日就話：「我都唔肯定球隊會將邊個號碼退役，不過有可能將兩個號碼一齊退役。」拜恩着8號贏咗三個總冠軍，職業生涯後期改着24號，又拎多兩個總冠軍；為咗凸顯呢位功臣嘅地位，將兩個號碼同時退役都好啱數。