阿根廷足總日前喺官方網頁公佈咗歷來最佳11人，入選嘅全部都係星中之星，而且多數係世界盃冠軍成員，而現役球員就得效力巴塞隆拿嘅美斯入選，不過，我求大俠就覺得美斯嘅入選，全靠阿根廷足總畀面，因為唔少滄海遺珠嘅前阿根廷國腳，佢哋嘅成就都好過美斯囉！
喺歷嚟最佳11人中，把守最後一關嘅係鋼門費路，佢喺1974、78同82年都有代表阿根廷踢世界盃，其中喺1978年阿根廷捧盃嗰屆，仲當選為賽事嘅金手套，今次入選實至名歸。四名後衞方面，現時球迷較為熟識嘅，相信係曾效力國米嘅辛尼迪同埋有「鐵血隊長」之稱嘅巴薩里拉；不過，其實佩費姆同埋泰蘭天尼亦係阿根廷殿堂級後衞，所以可以力壓「野獸」巴迪斯達同勒基利等名將。
中前場方面，就梗係唔少得馬勒當拿、巴迪斯圖達同甘巴斯等名將，而踢法勁瀟灑嘅列當度入選亦好合理。不過，美斯竟然都榜上有名，就有啲掹車邊囉，因為佢又未攞過世界盃，踢國家隊又經常冇表現；如果我求大俠揀，就梗係揀簡尼基亞都唔揀美斯啦，不過風之子衰吸毒，要入選又真係有難度。