今年政圈最大件事，首推年底嘅立法會選舉啦，民主黨除夕日公佈咗內部甄選名單，一班老將如主席劉慧卿、何俊仁同單仲偕，都冇再循各自所屬地區直選及功能組別出選，意味年底同議會講byebye，議會嚟個大換血。咁民主黨最大對手民建聯，年底又點擺位呢？花生友聽聞，換血度冇民主黨咁強噃，而且譚耀宗隨時因應需要又要留低！
𠵱家循新界西晉身立法會嘅譚耀宗，其實多番表明無意爭取連任㗎嘞，但建制中人卻紛紛指，選唔選都唔係由阿譚話事，皆因曾鈺成鐵定退任，立法會主席要搵人接，之前傳過嘅葉劉淑儀同梁君彥，全部欠缺駕馭能力，成個議會更加立立亂。
或轉區出戰
而立法會嘅亂局，特區政府驚過大家，花生友聽聞，特區政府都明示暗示阿譚應該再坐一會，始終都要大局為重！有人甚至話喎，驚新界西民記3條隊唔夠分？邊個話阿譚一定要出新西先，佢全港知名度都夠，加上地位深厚，轉區出戰話咁易，仲向花生友舉例喎，如果葛珮帆轉任副局長，阿譚去新東一樣得。嘩，唔係咁爆吓話？
阿譚話明想多啲時間湊孫㗎喎……呢位知情厚多士話喎，唓，做立法會主席可以脫離黨務，唔使似𠵱家咁管教民記一班馬騮精，未必同𠵱家一樣咁耗費心力喎！唔知呢啲軟功，𠱁唔𠱁得掂譚耀宗？
花生友
周二、四刊出