年紀越大，就越容易懷念那些年；事實上人生最開心嘅日子，真係莫過於天真無邪嘅童年。八方新一年會搵嚟唔同界別人士同大家「相」當年。
依起棚牙笑得燦爛嘅cutie短裙妹，大家估到佢係邊位嗎？其實係經民聯立法會議員梁美芬，估唔到佢約6歲時已經識擺甫士。圖中嘅女士係梁母，手抱嘅就係梁美芬細妹，特別之處係兩姊妹着嘅衫裙，都係梁母親手做㗎，梁美芬話呀：「媽媽針黹好叻㗎！」
四圍跑紥紥跳
呢位荃灣福來邨嘅屋邨妹，自言由細到大係奀皮妹，自爆會喺邨內四圍跑兼紥紥跳，最鍾意就係跳樓梯，越大跳得越多級，為免被阿媽捉住，咪跑去其他樓層跳囉，試過有次跳完後唔知點解唔識路返屋企，一路搵一路喊，好在媽媽最終搵番佢，少不免都被教訓一餐。
喺區內讀完小學後，佢中學時考入聖保羅男女中學，結果朝朝要行去荃灣碼頭搭船去中環，再轉巴士返學，全程兩粒半鐘，「通常都要喺船上溫書！」佢話屋邨生涯令自己學到好多嘢，至少會同左鄰右里溝通，令佢都好sociable。