回望逝去的2015年，或許你和他心裏滿是感恩句子，再難挨的日子終於挨過，可以向自己講句：「新一年重新嚟過。」就好似《春光乍洩》何寶榮對黎耀輝講：「不如我哋重新嚟過。」一樣咁浪漫，但又帶一絲傷感。
然而，如閣下不幸地在過往一年異常黑仔，換轉係我，與其默默地在facebook大事回顧，不如趁新一年去轉旅行。獨自行大運，好好靜處，思考人生，將心聲安葬在吳哥窟岩洞又好，又或者在十分點吓天燈都好，總之衰嘢統統講拜拜，迎接美好將來。之但係，一個人出門旅行，很多鎖碎物品都無得跟朋友分擔，要自己全包宴，分分鐘去程已經有20kg行李在手，帶多個旅行袋或大背囊，自然鬆動得多。
近年慢活主義興起，提倡生活不只有工作，要懂得relax，最好方法就是外遊。所以近季越來越多品牌注重旅行元素，除衣服設計講求物料延伸性和重量，免過份奢華，同時大背囊和旅行袋也頻頻登場，成為key item，總有一個喺左近。例如Louis Vuitton今季春夏除在服飾上帶我們遊走東南亞之間，更送上白色皮革旅行袋，希望大家與品牌一起高舉旅遊先決的精神。遠至英國的Dunhill則希望decent一族能夠做個傳統英式紳士，出門時要正裝和悠閒元素兩者兼備，拎番個望落classic，容量特大的牛皮旅行袋就至啱。Bally就主張玩樂至上，大男孩穿睡衣搭飛機未嘗不可，還要配一個佈滿懷舊標貼的傳統方形行李袋，復古與潮味參半，散發一種前衞的度假態度。
記者：許志勇