本港一年一度嘅體育盛事「渣打馬拉松」本月17日舉行，國產體育用品公司特步（1368）宣佈，再次成為渣馬嘅指定獨家服裝贊助商。不過，公司未公佈跑衫設計，唔知到時會唔會配合渣馬廿周年紀念，搞啲新花臣。
雖然特步喺香港冇零售業務，但今年係連續第5年贊助渣馬，記得第一屆時，件跑衫藍藍綠綠，跑手俾人笑似「史力加」上身。
之後幾年特步吸取經驗，跑衫設計相對正路。華華聽聞今年件衫，最快9號先有得攞，唔知到時會唔會畀到驚喜大家。
公司首席財務官何睿博之前講過，雙方合約過埋今屆就會結束，公司當然想同渣打續約，話晒宣傳見效。
但近年唔少內地運動用品公司，特別重視跑步產品，想搶到渣馬呢個黃金廣告時段，相信要出多好多錢先得。