今季冬天球員轉會市場喺一月重開，外界估計富甲一方嘅英超球會都會出手，使費仲隨時高達10億鎊（約115億港元）；而博彩公司立博更表示，有人喺元旦嗰日重注美斯會喺2016年以世界紀錄轉會費由巴塞隆拿轉投其他球會，搞到個賠率由34倍勁落飛到得番六倍㖭咋！睇嚟今個冬天，將有唔少歐洲星級球員嚟英超搵英鎊。
曼城想簽美斯引哥帥過檔
英超球會向來鍾意喺冬天轉會市場增兵，而喺對上八年，總使費就超過10億鎊，但由於車路士、曼城、阿仙奴、曼聯同埋利物浦都可能有重磅收購，因此今年一個冬天嘅使費，分分鐘去到10億鎊都唔奇！由於英超喺2016年至2019年嘅電視轉播合約由原來22億鎊升到32億鎊，所以令到本身經已有錢嘅英超球會變得更有錢，可以喺一月嘅球員轉會市場大買特買。英國傳媒指，喺去夏豪掟1.3億鎊簽入史達寧、奇雲迪布尼同埋奧達文迪嘅曼城一定會出手，除咗睇中皇馬嘅西班牙中場艾斯高之外，仲想簽入巴塞前鋒美斯，望能引到今夏同拜仁慕尼黑約滿嘅西班牙籍名帥哥迪奧拿嚟伊蒂哈德航空球場教波。美斯離開巴塞並唔係冇可能，有人仲重槌買呢位28歲球員今年內以破世界紀錄嘅金額轉會！
博彩公司立博嘅發言人當路曉表示：「成日有傳曼城今年會以破紀錄嘅轉會費簽美斯，有人仲深信一定會成事，只係時間問題，就算冬天轉唔成，夏天都一定轉得成。」同曼城喺英超爭崩頭嘅阿仙奴就去德甲班兵，願出4,250萬鎊簽喺上半季幫多蒙特入咗24球嘅加蓬前鋒奧巴美揚，據聞雙方仲經已坐低傾緊；但據報曼聯都睇中呢位速度極快嘅26歲球員，睇嚟兵工廠主帥雲格要加多幾錢肉緊至得。
高路普搵達史特根救亡
至於隊波要大執嘅利物浦，佢哋嘅德國籍領隊高路普見到正副選門將米洛列特同埋阿當保丹都騰騰震，計劃搵踢緊巴塞嘅同鄉達史特根返嚟。達史特根雖然係巴塞踢歐聯嘅正選，但喺西甲只能當哥迪奧巴禾嘅副手，影響到佢喺德國國家隊嘅前途，所以應該有興趣由搵歐元轉搵英鎊。而下半季要發奮圖強嘅車仔，亦睇中薩克達中場阿歷士泰斯拿同埋愛華頓後衞史東斯，但埋單可能要成7,000萬鎊。