上星期二12月29日，突然WhatsApp群組有不少短訊傳來，皆係引述Now新聞台一段新聞，指梁特首與商界人物聚會時，叫商人捐錢俾香港科研，唔好捐俾大學，因為大學已經好有錢，教職員過剩咁講。此消息不知堅定流，政府梗係唔肯確認嘅啦，但消息傳開咗，大學籌款界人士為之驚愕，對此討論熱烈之極，不少大學人員嘅FB都紛紛留言，一位人士對左丁山講：「洗板呀，洗板呀，大學校監咁樣講，想我地失業啫！」
政府高官對大學籌款，並不熱情，左丁山知道嘅，約兩年前，左丁山有機會見到大官，親自問佢點解政府預算案刪除咗大學籌款配對基金十億元（Matching Grant），大官冷然回覆：「大學已經好有錢啦。搞Matching只係益咗Hong Kong U嘅啫」，有好多人在場，左丁山不便與大官駁嘴，只係覺得大官對大學有偏見。現在睇到（未經證實）梁振英發出相同類似言論，哦，明白嘞，特首與大官或有政治歧見，但對待大學籌款方面，口徑相同。
商界人物會唔會聽完政府之言，就唔肯捐款俾大學呀？如果咁聽話，Hong Kong U籌款大姐大徐詠旋要準備退休都得咯。去年最令人矚目嘅捐款人當然係年過九十嘅李達三先生，李先生係寧波大老，曾任新亞書院校董三四十年，到咗九十歲先至退下來，然後捐款三億，一億俾港大，一億俾城大，皆與梁特首倡議嘅醫學研究有關，另捐一億俾中大做中醫藥研究。去年十一月，又正式捐款三億元，中大港大科大各得一億元，作為學生獎學金，其中聽講話如果寧波中學有學生進入三大，必定可以攞到獎學金，可見李先生愛護家鄉之情深一片，寧波中學學生努力嘞！
香港富豪不論籍貫，如能多多向雙李看齊，即潮州李嘉誠、寧波李達三，多多捐款俾本地大學，對本港教育文化水平有長遠好處。香港最有錢嘅大學，香港大學，在國際上，其實頂多係中產階級，與富豪級哈佛耶魯普林斯頓史丹福之富裕程度，完全冇得比。但哈佛耶魯仍然拚命向校友及商界勸捐噃，籌款不遺餘力，邊度有美國總統敢講一句哈佛大把錢，商界唔駛捐款俾哈佛㗎。特區政府高官對發展高等教育，目光如豆，最近搵一位會計師唐家成做教資會主席，替代有心有力嘅鄭維新，左丁山真係有啲驚驚地，大企業搵親會計師做CEO就係要削支出，控制成本，教資會由會計師執掌，係唔係要大學交數呀？