出售內地禁書的銅鑼灣書店股東李波，疑遭內地執法人員由香港帶回內地，惹起不少港人擔心內地執法人員非法在港執法，有泛民中人指，事件雖仍在調查中，但即時的影響是不少港人也稱無論如何也要「打冧」一地兩檢，更要求泛民反對高鐵追加撥款，「有街坊仲話，高鐵爛尾都好過畀大陸公安日後可以喺高鐵站拉香港人」。
該泛民中人稱，雖然特區政府一直稱，一地兩檢不代表內地執法人員可以在港拉人，但令人擔心的卻是，「內地公安可以偷偷嚟港挾香港人返深圳，特區政府完全一粒聲都冇」。他指有街坊稱，萬一日後高鐵站有內地執法人員執法的樓層，「到時公安、國安唔使挾你上深圳咁麻煩，挾你去高鐵站公安執法嗰一層，就算報警，差人都話冇執法權，之後公安再掟個人上高鐵直送北京，你話幾恐怖！」
此泛民人士稱街坊的恐懼非過份，「現實真係有香港人被挾上大陸，仲點叫佢哋信一地兩檢唔會有事！」此事也令泛民更加不可能投票支持高鐵追加撥款，「原本政府打高鐵爛尾呢隻牌，或者仲有市民覺得過咗佢算，𠵱家多咗懷疑公安越境拉人，好多街坊話情願高鐵爛尾」。
另一泛民議員則說，近日不斷有傳媒揭發，政府當年申請高鐵撥款文件內容不盡不實，「好似政府話48分鐘由西九龍到達廣州，原來冇計停站，計埋停站高鐵其實只快直通車10分鐘左右」，指當日支持撥款建制派，要對政府欺騙立會負責，若建制派仍然支持追加撥款，「9月立法會選舉，（泛民）一定拎住呢樣嘢追住打，睇吓佢哋點同選民交代」。
季陶
周一、三、五刊出