近年銀行或財務公司的借貸手續越來越簡單，去年與錢國偉結婚的陳宛蔚（Calinda），其家人亦因此而「中招」，數月前，疑遭家傭偷走銀行月結單，一次過問七間「財仔」借貸十幾萬元，最後陳家人被追數公司寄陰司紙到寓所，超恐怖！
Calinda昨日在微博寫着﹕「家中一定要有碎紙機，私人文件小心被盜用！」她接受電話訪問時說：「我諗工人係有啲用咗我哋嘅bank statement，有啲就自己借，佢突然話屋企人有事就飛走咗。冇耐有財務公司職員打電話嚟屋企搵佢，對方粗口爛舌話我哋包庇佢，仲寄陰司紙嚟我哋屋企，當中夾咗屋企人嘅bank statement，話『我知你哋住邊㗎，小心啲。』」
報警平息風波
Calinda與家人商議後便報警求助，她說：「好彩我哋有啲人民入境事務處發出嘅信，證明工人已經離開咗，我哋唔需要承擔呢筆數，警方亦好好，間中會打嚟問我哋仲有冇俾人騷擾，𠵱家都停止咗。」Calinda呼籲大家要小心處理個人文件，並謂：「大家都應該買部碎紙機喺屋企，原來攞bank statement，唔使身份證都可以借錢，真係唔知仲有乜嘢其他用途，始終係好personal嘅嘢。」
Calinda黑仔事不只一單，早前自己的信用卡又俾人盜用作海外簽賬，她嘆氣謂：「我睇電話短訊，突然發現有人喺英國簽賬，10分鐘過咗七條數，好奇怪。我即刻打去銀行問發生乜嘢事，原來喺一個網站不斷俾人碌卡，金額由百幾蚊至七百蚊左右，好彩最終銀行都扣番我呢筆數，但大家都係要小心啲。」
採訪：嵐山
