一位單親媽媽同神奇拖板，聽起來不會是成功嘅關鍵詞，更不會聯想到原是個創造半億美金財富嘅真人真事。
59歲美國女企業家Joy Mangano發迹史被改篇成電影《歡姐當自強》。創業可以由生活出發，Joy發明神奇地拖，拖地可以污水不沾手。產品最後爭取到全國電視購物頻道，廿分鐘賣到萬八件，逐步建立家居用品王國。其實「勵志歡姐」Joy成功非僥倖，12歲已經滿腦子發明計仔。佢認真研發神奇地拖前，曾經諗過發明夜光寵物嘅頸帶，最後被寵物用品商Hartz Mountain搶先推出。
戲中講出創業可以有幾艱難。單親媽媽阿Joy發明神奇地拖，產品打出名堂後，身邊嘅人不以為然，「新發明有幾特別」等冷嘲熱諷撲面而來，甚至連親阿妹都冇面畀，問番爸爸點解幫晒家姐創業。阿Joy嘅神奇地拖嘅創業故事喺香港或者出現過，但未必個個都有阿Joy嘅圓滿結局。
假如你發明咗神奇地拖，喺一個月後可能見到旺角花園街擺咗三、四檔「複製產品」，你苦心經營嘅idea，變成人家生意資本，有借冇還。上個月佐敦甜品店佳佳只獲米芝蓮推介，業主立即嗌加租一倍幾。借用阿Joy戲中對白共勉，「命運或者會不公平，但你可以選擇不接受命運」。
Captain Cool
本欄逢周一刊出