飛髮佬、線面……上一代人在後巷放張櫈，就可以搵食；今時今日，連鎖店、大商場，最多「一人公司」的服務業手作人，要開創可以生存的自主空間，就要動腦筋。為避貴租，有人藏身工廈，開一人髮廊；有人就拉攏IT朋友，開發類似Ubar的配對手機應用程式，方便顧客預約服務，又連結美容美甲等服務行業，以合縱方式推出聯合優惠，單挑大集團，打破單打獨鬥困局。
記者：呂麗嬋
要幫襯嚴子龍（Ted）的一人髮廊，要先「探秘」。髮廊位於屯門工廠大廈7樓，穿過小街再坐貨𨋢，行行重行行。「學滿師，個個都想創業啦」。700呎工廈單位，既是髮廊，也是band房，「最初喺走廊執塊鏡，坐喺走廊幫朋友剪，後來索性租個單位，由最初一塊鏡，變到現在四塊鏡」。工廈位置隔涉，靠朋友口耳相傳，一人公司包辦洗剪恤，一手泡遇上客人來電預約，最麻煩。
「以前打工，公司有人代接booking；一唔係街客，到自己出嚟做，請唔起人，年尾旺季，試過同一時段約咗幾個人，又試過以為約咗個客，其實取消咗」。Ted笑言，這在很多人眼中，可能只是瑣碎小事，卻足以令一人公司癱瘓！單打獨鬥的困局，見證行業興衰的林國文深有同感。「最痛苦係每晚放工，仲要花幾個鐘回覆預約，whatsapp來來回回，花兩粒鐘係閒事」。林無奈的說。
92年入行做學徒，參加公開比賽得獎，收過徒弟創過業，見證過年剪髮三計，也試過大舖搬細舖，千帆過盡，還是敵不過貴租，關門收場。「現在改以自僱方式掛單，髮廊提供地方設備，其他自己一腳踢，否則好難生存」。香港現時約14000名髮型師，9成自僱，還未計小商場內「打單泡」或夾份分租舖位的美甲師美容師。「有次同個熟客剪髮，呻咗兩句，佢做廣告，熟IT嘢，提議不如搞個自動預約系統」。
林口中的熟客，正是楊民樑。「Booking以前多打電話，現在就whatsapp，離不開就時間、問價錢，如果有個平台，自己填，一目了然，方便好多」。剛好遇上阿樑與朋友自組公司，三個人一拍即合。如是者，名為「8ookings」的Apps應運而生，9月上架，已有近300髮型師加入。林說：「都說髮型行業要走喺時代尖端，獨獨運作上嚴重落後。我哋無大集團撐腰，各顧各好易死，遲一步想連結埋其他美容行業，合作推出優惠」。此路不通就另謀新路，互聯網創造的，大抵是無限可能吧？