港大校委之一嘅醫學院外科學系教授盧寵茂，前晚除夕外出準備睇煙花倒數期間，喺尖東俾近百名自稱「鳩嗚團」嘅人追住噓，搞到盧醫生即場面黑，未等倒數就同太太十指緊扣走人。作為傳媒報道呢單新聞好正常，八方發現，有疑似盧醫生fb賬戶「Chung Mau Lo」，喺本報網上新聞留言：「對！除夕有這些人，這些事，這毒果，我面懵，所有香港人都面懵！新年快樂！」不過遭網民留言反駁，質疑佢憑乜代表香港人，又話佢既然做得出撐CY、插水扮腳傷，就預咗俾人鬧！八方WhatsApp向盧寵茂求證，佢承認Chung Mau Lo係佢本人，仲話：「已在網上向你的報導回應，這些人，這事，這報導，令香港面懵。」