有睇《足球小將》嘅朋友，相信對立花兄弟嘅雙人射門一定唔陌生，而話唔定喺歐洲主要聯賽，好快會出現真人版立花兄弟！報道指法甲班霸巴黎聖日耳門（PSG）有意以750萬鎊（約8,620萬港元）羅致有「奧地利伊巴」之稱嘅史篤城前鋒阿拿奧杜域（圖），等佢同真正嘅伊巴謙莫域組成「法甲立花兄弟」。話說PSG兩年前已睇中咗阿拿奧杜域，仲認為26歲嘅佢𠵱家大熟大勇，打算將呢名奧地利國腳收歸旗下。眾所周知，阿拿奧杜域踢法同造形甚至脾氣，都同PSG嘅前鋒伊巴謙莫域好似；如果佢成功轉會，到時兩個伊巴同場，相信會搞到對手後防頭都大埋。另一邊廂，今夏同PSG約滿嘅伊巴就透過經理人話有意到英超，所以PSG分分鐘係搵奧地利伊巴代替真伊巴咋！