噚日正式創黨嘅新思維，至今擁有62位黨員，唔少成員都好生面口，未算廣為人熟識，但係獨有一位仁兄，八方卻覺得好面善，佢喺首次會員大會未完結前就提早閃，原來係前無綫兼前港視演員黃澤鋒（圖），48歲嘅佢話係首次參加本港政黨。
黃澤鋒透露獲新思維副主席姜炳耀介紹入黨，原因係自己支持中間路線，唔鍾意激進囉。咁入黨係咪想參選先？佢話自己冇咁嘅諗法喎！
其實黃澤鋒曾經係香港飛魚嚟㗎，15歲代表香港出戰美國分齡賽事，80年代仲多次奪得香港渡海泳冠軍。佢喺TVB期間擔任多個「綠葉」角色，近年參與港視《導火新聞線》嘅演出，𠵱家係泰拳教練。