紀惠集團行政總裁湯文亮原來唔止鍾意打羽毛球，仲熱愛推動其他運動，佢身兼灣仔體育總會會長，總會噚日喺灣仔修頓球場主辦「港交所盃足球邀請賽」，搵來精工、南華、愉園元老足球隊，與港交所足球隊較勁，港交所先贏一場，冠軍賽就輸咗畀愉園，只得亞軍。
噚日雖然不時落住毛毛雨，但係港交所（388）行政總裁李小加都唔怕濕身，踢足兩場7人足球比賽，首場港交所對精工元老隊，以3比1勝出，李小加踢前鋒位，有份貢獻一球。
但係到咗冠軍賽對愉園元老隊，就冇咁易踢喇，港交所最終以2比5落敗，不過李小加都幫手入咗一球，成績唔錯喇，2016年一開始就有波入，算係好兆頭。至於灣仔體育總會會長湯文亮，佢噚日就冇落場，只係企喺旁邊做啦啦隊。