今日係2016年第一個交易日，就要諗定新一年贏錢之路點樣走。喺未寫推介之前，首先講吓未來一年應該點樣將股票分類，從而將股票選擇收窄，只揀選有潛力嘅股票。小弟嘅方法係分為四大類，衰退股、食老本股、增長股同埋殼股。
所謂衰退股，多數都係中資股，就好似今時今日銅鋁鋼股，暫時睇唔到翻身之日，但唔代表超長線一定唔得，但首先你要睇到有復蘇嘅因素同劇本出現，加上技術走勢轉強配合，先能夠買。至於食老本股，多數係本地概念股，本身業務長遠難有進步可言，但可以跟隨周期上落，例如本地地產股。長線投資的話，如果搵到有發圍嘅股票，就無謂買呢類食老本股了，因為佢哋只懂與大市同步，幫唔到大家發達。
增長股唔使多講，典型例子係騰訊（700）同埋舜宇光學（2382），佢哋身處行業可能有增長，又或者佢哋開發新業務嘅能力高超，每次大家質疑佢哋江郎才盡之際，及後往往能夠交出好成績畀大家，到時股價又再破頂。買呢類股最重要等佢哋被質疑嘅時候買，買嘅信念就係靠track record，因為佢哋經常開發到新增長點，證明佢哋經營能力比其他上市公司強，所以呢類股票趁低撈嘅勝算亦係最高，賠率另計。
長線投資最發嘅，必定係揀由衰退股變增長股嘅股票，希望今年有尋寶機會。
晉佳
http://www.facebook.com/pages/ 晉佳/719009541518415