年頭年尾聽歌多，有時聽極唔明，點解做歌手攞獎會喊（圖），但做運動員贏咗會笑呢，諗落其實做運動員真係easy得多啦！嗱做歌手一定要靚仔靚女，眼鏡唔可以有霞氣；做運動員話知你外貌如何，總之好波就型，屎波就靚都變醜。
做歌手鍾意唱歌要畫公仔畫出腸大大聲話畀人知：我真係好鍾意唱歌㗎；運動員可以慳番啖氣，見你練到死死吓仲唔放棄就知你係癲嘅。
做歌手終於一日龍穿鳳，功勞永世唔屬於自己，先要多謝十間機構十個大哥大姐；運動員呢就知道最需要多謝嘅係自己，因為從冇比賽係靠關係贏嘅。
歌手要有出息要講人和，關係好先搵到首好嘅歌，時間啱先跪求到首好詞，啱嘴形先博到播多幾次；運動員就完全唔使擔心呢啲人事嘢，因為本身就冇乜人會畀面運動員，個個一視同仁都係地底泥，到有出息嗰日就突然人人撲埋嚟，直到你冇成績為止。
做一個好歌手，前前後後有太多嘢要兼顧，所以好多時會唔記得咗做好最重要嘅本份，就係唱好一首現場演繹嘅歌，唔緊要啦，大家總搵到理由嘅，譬如緊張啦興奮啦音效啦病啦多嘢做啦，我都唔想嘅；運動員呢就毋須諗藉口，因為所有運動項目都係live嘅，每個比賽舞台都係直播嘅，到時得就係得，唔得就走得。
歌手話今時今日生不逢時，所以條路好難捱；運動員呢就從來冇怨過，因為以前同𠵱家都一樣，從來都冇乜經濟效益，從來都係每日新聞入面可有可無嘅一段，冇期望所以冇得失望，樂於淡薄。
做歌手成日話身在曹營心在漢，就算我做緊其他嘢呢都係搵食，拍戲廣告代言都係角色扮演箒，始終我嘅歌手身份係莫失莫忘嘅，跟我一世嘅；運動員呢就唔使煩咁多，你一日係運動員一世都係運動員，吓想轉型做第二樣？其他人會提醒你得唔得識唔識掂唔掂㗎，多得大家，你想唔記得自己係運動員，都好難！
KEYMAN
節目主持