近日嘅退休保障諮詢引起社福界與經濟學界熱烈討論，正反意見分明。退休保障不能不談人口結構及生育率與平均壽命年期。香港人口有一個大特色，就係平均壽命長，生育率奇低，故此年老人口比例愈來愈高，即係話二十歲到六十五歲嘅適齡工作人口佔總人口嘅比例，不斷下降。
睇番啲人口數字：2011年中，人口年齡在65歲以上嘅，佔總人口707萬之13.4%，即94萬7千幾人；四年後，2015年中，呢個比例上升至15.4%，佔總人口730萬之中，有112萬人，短短四年之間，長者（65歲以上）已經增加18萬人，如果全部有資格攞政府派出嘅退休津貼，條數真係幾襟計，大家試吓㩒計數機，就知道特區政府點解老大不願意實施全民退保，而要建議資產審查，希望壓低可以申領退休津貼嘅長者人數。
再睇吓0至19歲人口，2011年中，此年齡組別佔總人口17.6%有124萬7千餘人，到2015年中，此比例下降至16.2%，人口有118萬左右，減少咗6萬幾人。如果香港年輕一代將來能夠交稅嚟應付退休津貼，未免期望太大啦，假設其他條件不變，香港工作人口一路減少，退休長者一路增加，年青人仲唔斷擔挑？
左丁山年紀大咗，就會留意訃聞，睇吓有冇前輩上咗天堂。呢日睇到一位潮州名人去世嘅訃聞，知道佢連埋兄弟姊妹加埋有12人，可見呢位名人阿爸阿媽生產力旺盛。去世名人自己有三男四女共七位孩子，都好肯生育，第三代有幾多個呀？孫男孫女及外孫男外孫女一共八名，外曾孫女一名，數吓手指，就知道生育率一代低於一代，主要原因當然唔係經濟理由（呢家人屬富豪級），而係現代大勢所趨，60年代70年代家計會做事太過成功，人人識唱「兩個就夠晒數！」左丁山同輩之中，生三個孩子已是少數，生四個只有一位，其他都係一個起兩個止，香港人學足西歐先進國家，對生育興趣不大，現在西方國家嘅退休長俸制已經有爆煲危機，直情係與低生育率及人均壽命延長有關，香港怕要從中吸取教訓喇啩。最近睇施永青介紹一本美國暢銷書"America Alone"，內裏講及全世界白人出生率低，伊斯蘭教徒出生率奇高，有朝一日，穆斯林（回教徒）會人多制勝，移居歐洲諸國，最後憑選票統治歐洲國家！生育率豈止決定退休長俸制之前途，直情與政治前景有莫大關係。