新一年又到，你我繼續醉生夢死，今朝有酒今朝醉，懶理今夕是何年。2015年，蝦碌奇聞好比連續劇，有誰比齊昕摑母更戲劇性？一時手痕？女鬼上身？酒意正濃？還是這個母親是龍蝦？港人跳了線、亂了龍，自己的事救不了，只好八卦人家事。因為This is Hong Kong。這篇醉後狂想，認真你算輸，除非你贏。
CY說，齊昕健康有問題，搞清楚，誰先有問題。老人院服務參差，係土地問題；《學苑》被屈鼓吹港獨，係有問題；特首地位超然呢，就冇問題。我說，最大問題係冇過海的，不是去慢駛抗議，便是載水貨客。冇的搭，冚旗是我不是你，司機大爺。天呀，一提水貨客火都嚟，有掃奶粉，有掃金莎，有掃月餅，這麼有層次，防不勝防。一場世界盃外圍賽，也變成政治鬥爭，香港隊勁揪，都不及懷仔好揪。大蝦細好閒，非法留港好閒，犯咗法又點喎？最多返大陸，eat、sleep、recycle照loop。
嫻姨姨老貓燒鬚，幫倒忙算了，也別太失儀。在WhatsApp群組暗示「黃花龜女」？OMG，下面反應很大，你叫曾鈺成點冷靜，點hold會，點通風報訊？政改被否決，點兜點喊都多餘，無謂狗咬狗鬼打鬼沒完沒了，仲表演唔夠？建制派區選落敗，網民剝花生開烈酒熱烈彈唱，葛根湯也下不了火。關鍵是細佬畀人鍊住，連累曾德成被辭職。
說到底，最慘劉皇叔，遲來做了替死鬼，市民心裏面好唔舒服，你估遲到因為中途停低睇國旗？塞車之嘛。塞車不是今天事，唔關電車事，唔關四棵古樹事，不用先斬後奏。反正港人乜都塞，港鐵月台又塞，宜家大減價又塞，雪糕買一送一又塞，消防新仔個肛門都塞（忌廉）。HeHe，迎新嘅嘢，市民識條鐵。
你說人到無求品自高，林鄭說官到無求膽自大。上至高官，下至細路，個膽都唔細，是操得TSA多，還是飲得鉛水多，腦筋發達，延年益壽。高官落區推銷爛方案，細路一樣冇有怕，你呃我唔到，講完。成也細路，敗也細路，高永文陪細路長跑，一出閘脫腳，鼻都爆埋，悲劇。盧寵茂仆得仲應，冇人掂照仆。兩大醫生能醫不自醫，醫院壓力梗係大。怎說呢，切錯肺，換錯肝，按問責制，算情有可原？
都是資源分配不足之過，全用在高鐵同三跑上，哪有錢？冇錢，DSC同BURGER KING執笠；冇錢，寬頻推銷員跪客求單；冇錢，亞視拖糧，葉家寶請辭。冇錢，咪走水貨囉，咁的士咪載水貨客囉，咁齊昕咪冇的士搭囉，咁急起上嚟，咪摑佢老母囉！
好似係，除非唔係。
撰文：杜秋棠＠抽水站
https://www.fb.com/freakingwestlook