正所謂「屎波架生多」，湖人喺NBA元旦日主場對東岸包尾嘅76人，後備射手尼克楊格（Nick Young）諗住贏硬，着對「三間」潮鞋落場（左圖），仲寸「三間」嘅商業對手「一剔」新年前已經收檔；湖人雖然贏93:84，不過楊格只拎得八分，下半場仲要換番對正規籃球鞋比賽㖭（右圖）。
其實楊格12月中已經着對炒價達兩萬蚊嘅卡其色版Yeezy Boost 750潮鞋對火箭，喺元旦日主場出擊就着咗對正價3,500蚊、一出就被秒殺嘅黑色版比賽，對鞋炒價𠵱家去到萬五蚊㗎。呢對潮鞋嘅設計師兼歌手Kanye West，就出咗首新歌《Facts （Explicit）》唱衰「一剔」，歌詞話佢哋對員工好似奴隸咁，畀勒邦占士啲錢唔好走數咁話；而楊格仲有樣學樣，喺twitter話「一剔」新年前已死。
不過，潮鞋始終係潮鞋，落場打波就真係爭啲，楊格上半場着住潮鞋，四射只得一中拎三分，下半場換番籃球鞋比賽，叫做好啲，埋單全場貢獻八分同四個偷波。湖人贏波功臣就梗係唔係佢啦，拜恩（Kobe Bryant）今仗因傷缺陣，得分後衞L威廉士（Lou Williams）拎24分，幫湖人贏九分，攞到今季第七場勝仗，而76人繼續以三勝32負排聯盟包尾。