【灣仔】吳雨霏（Kary）舊年7月嫁咗畀網球王子洪立熙（Brian）後，專心做人妻，前晚元旦夜未見佢出席叱咤頒獎禮，反而選擇同屋企人喺灣仔食海鮮過元旦。Kary同老公、細佬同阿妹等人擦海鮮到9點幾離開。
身穿間條衫、黑褸打扮嘅Kary同Brian殿後，Kary細佬同阿妹就行先，四個人喺食店門口傾咗幾分鐘，先分兩部車散。Kary一個箭步行去先，走去佢哋保時捷座駕，更全程有兩個食店嘅外籍店員幫佢開路。全程見Kary冇乜表情，仲表現得有啲唔耐煩，企喺座駕側邊等咗Brian一陣，但Brian同Kary細佬吹水後，才施施然行去司機位開車走人。
採訪、攝影：畢紹基、徐錦池