皇家馬德里中場占士洛迪古斯（J-Rod），喺今季唔係太受教練賓尼迪斯重用；唔知係咪一肚悶氣，佢要揸快車發洩吓。J-Rod日前揸住佢架Audi R8（圖）返皇馬訓練場操練，開到成200公里咁快，隨後架Opel Astra警車想追佢都追唔到，去到訓練中心外面指示佢停車都冇理。之後警員入去訓練中心檢控J-Rod，根據西班牙當地法例，占士超速嘅M40公路時速上限係100公里，一旦超過呢個限制速度多80公里嘅話可以被視為犯法，可以判坐三至六個月監禁。
