隔牆有耳：
型佬鄧竟成渡海泳被集郵 - 李八方

好多香港人選擇元旦凌晨出街倒數玩通頂，但都有人元旦假期游早水。香港拯溺總會噚日喺南區舉行一年一度元旦冬泳賽，今年已經辦到第40屆，有超過2,200人參賽，參加者由中灣落水，游到淺水灣為終點，全程大約600多米，好多老中青市民參加，最年長參賽者83歲。
大會仲請到警隊前一哥鄧竟成做主禮嘉賓，八方原本以為，keep得又fit又有型嘅鄧竟成會落水游埋一份，點知冇，只係同參賽者打氣，八方見前一哥好受市民歡迎，好多參賽者游完渡海泳，都上前「集郵」（圖），滿載而歸。