新一年，第一句梗係同讀者講聲新年快樂啦。送舊先可以迎新，身上衫褲鞋襪奉旨換新裝，當中最唔起眼嘅襪，就唔知點解成日好易穿窿，要麼唔理繼續着，要麼勞煩阿媽買過對新。不過日本有位神人女網民認真夠堅持，最近喺網上分享咗佢兩對着足超過二十年嘅襪，你無睇錯，係二十年。當對襪一穿窿，佢就好有心機咁一針一線，搵五顏六色嘅毛冷縫補，補到天衣無縫不失美感，依家每年平均買兩對新襪就夠，以備不時之需，隨即引來唔少網民讚好，讚佢夠晒毅力。當事人話自從第一次嘗試補襪後，自此就停唔到繼續補襪，今次仲Share咗個補襪教學，鼓勵大家都可以學吓喎。
記者：余瑋
資料來源：twitter.com/basilsauce