大阪飛腳（圖）元旦日喺東京同浦和紅鑽爭日皇盃，憑前鋒安達臣柏德列上、下半場各入一球，贏2:1而成功衞冕。上季飛腳包辦日聯、日皇盃同埋日聯盃而成為三冠王，但今季佢哋先後喺日聯盃決賽同埋日聯季後賽總決賽輸畀鹿角同埋三箭，嚟到季尾攞到日皇盃總算有啲安慰。紅鑽仲慘，上半季強勢贏日聯首階段冠軍，點知後繼無力，接連失落日聯總冠軍同日皇盃，教練柏杜域好難同球會高層同球迷交代。